کیا خبر تھی اجنبی پہ دل فدا ہو جائے گا
جو کبھی میرا نہیں تھا وہ مرا ہو جائے گا
عشق کرکے غم میں یہ دل مبتلا ہو جائے گا
درد اس کا حد سے ہونے پر دوا ہو جائے گا
میں ہوں اک مرد قلندر اور تو رند بلا
تیری قربت میں رہوں تو دل فنا ہو جائے گا
مردنی چھائی ہوئی ہے رخ پہ اے ہمراز کہ
دیکھ لوں تجھ کو تو چہرہ خوش نما ہو جائے گا
ٹمٹماتے ان چراغوں کو حقارت سے نہ دیکھ
آسماں پر مثل سورج وہ دیا ہو جائے گا
صدق دل سے تو مجھے اپنا سمجھ کے دیکھ لے
ہم نشیں تو ہم نوا اور دل ربا ہو جائے گا
بھینی بھینی یہ ہوائیں اور حسیں یہ وادیاں
ایسی حالت میں تجھے دیکھوں تو کیا ہو جائے گا
ڈر رہا تھا جو میرے قطع تعلق سے کبھی
لگ رہا ہے اب وہی مجھ سے جدا ہو جائے گا
جو وفا کی کر رہا تھا مجھ سے ہر دم گفتگو
کیا پتا تھا اب وہی مجھ سے خفا ہو جائے گا
چھوڑ کر جانا ہے جس کو یوسفی جاتا رہے
تو نہیں تو اور کوئی ہم نوا ہو جائے گا
